കരിമ്പ നിർമ്മലഗിരി പള്ളിയിൽ,ധന്യ മാർ ഈവാനിയോസ് അനുസ്മരണവും, പദയാത്രയും,അവാർഡ് വിതരണവും നടത്തി

 

കരിമ്പ : പുനരൈക്യ പ്രസ്ഥാനത്തിൻ്റെ പ്രണേതാവും മലങ്കര സുറിയാനി കത്തോലിക്ക സഭയുടെ സ്ഥാപകനുമായ ധന്യൻ മാർ ഈവാനിയോസ് പിതാവിൻ്റെ 72-ാമത് ഓർമ്മപ്പെരുന്നാൾ കരിമ്പ മേഖലയുടെ ആഭിമുഖ്യത്തിൽ കരിമ്പ നിർമ്മലഗിരി സെൻ്റ് മേരീസ് മലങ്കര സുറിയാനി കത്തോലിക്കാ തീർത്ഥാടന പള്ളി അങ്കണത്തിൽ (മാർ ഈവാനിയോസ് നഗർ) ആഘോഷപൂർവ്വം നടത്തി.അഭിവന്ദ്യ ആൻ്റണി മാർ സിൽവാനോസ് എപ്പിസ്കോപ്പ (കൂരിയ ബിഷപ്പ്) തിരുനാളിന് മുഖ്യ കാർമികത്വം വഹിച്ചു. തിരുനാൾ ദിനത്തിലെ ഭക്തിനിർഭരമായ പദയാത്ര കാഞ്ഞിക്കുളം ഹോളി ഫാമിലി പള്ളി അങ്കണത്തിൽ നിന്നും ചിറക്കൽപ്പടി സെൻറ് ജോർജ് ദേവാലയം അങ്കണത്തിൽ നിന്നും ആരംഭിച്ച നിർമ്മലഗിരി മരിയൻ തീർത്ഥാടന പള്ളി അങ്കണത്തിൽ സംഗമിച്ചു.പദയാത്രയ്ക്ക് അഭിവന്ദ്യ പിതാവ് സ്വീകരണം നൽകി. മേഖല വികാരി വെരി. റവ ഫാ.ചെറിയാൻ ചെന്നിക്കര, റവ. ഫാ. പൗലോസ് കിഴക്കനേടത്ത്, റവ.ഫാ. കുര്യാക്കോസ് മാമ്പ്രക്കാട്ട്, റവ.ഫാ.മരിയ ജോൺ, റവ.ഫാ.ജോസഫ് പുല്ലുകാലായിൽ, റവ. ഫാ. ജേക്കബ് കൈലാത്ത്, റവ.ഫാ.പൗലോസ് പരിയാരത്ത് എന്നിവരുടെ നേതൃത്വത്തിൽ വിവിധ ഭക്തസംഘടനകളുടെ സംയുക്താഭിമുഖ്യത്തിൽ സംഘടിപ്പിച്ച അനുസ്മരണ പദയാത്രയിലും ആഘോഷമായ വിശുദ്ധ കുർബാനയിലും പൊതുസമ്മേളനത്തിലും കോയമ്പത്തൂർ സെൻ്റ് തോമസ്, ആരോഗ്യമാത മിഷൻ, ഒലവക്കോട്, കോങ്ങാട്, കാഞ്ഞിക്കുളം, ജെല്ലിപ്പാറ,ചിറക്കൽപ്പടി, ഇരുമ്പാമുട്ടി,മണ്ണാർക്കാട്, കരിമ്പ ഇടവകകളിൽ നിന്നുമുള്ള വിശ്വാസികൾ പങ്കെടുത്തു. സൺഡേ സ്കൂളിലും പൊതു പരീക്ഷകളിലും മറ്റ് മേഖലകളിൽ മികച്ച നേട്ടങ്ങൾ കൈവരിച്ചവരെയും ആദരിച്ചു. മലങ്കര കത്തോലിക്ക യുവജന പ്രസ്ഥാനം കരിമ്പ മേഖല  2025-26 വർഷ കർമ പദ്ധതികളുടെ പ്രഖ്യാപനവും നടത്തി. ആശിർവാദത്തിന് ശേഷം സ്നേഹ വിരുന്നോടുകൂടി അനുസ്മരണ സമ്മേളനം സമാപിച്ചു