മണ്ണാർക്കാട്:പോത്തോഴിക്കാവ് തടയണയുടെ ശോചനീയാവസ്ഥ നാട്ടുകാർക്ക് ആശങ്കയും അപകട ഭീഷണിയും സൃഷ്ടിക്കുന്നു. ജലസംഭരണത്തിനും കുടിവെള്ള വിതരണത്തിനുമായി നിർമ്മിച്ച ഈ തടയണ,അനാസ്ഥയും അശാസ്ത്രീയ നിർമ്മാണവും കാരണം ഇന്ന് മണ്ണിടിച്ചിൽ, മലിനജലം,പകർച്ചവ്യാധി ഭീഷണി എന്നിവയ്ക്ക് കാരണമാകുന്നു. തടയണയുടെ സ്ലാബുകളുടെ അഭാവവും പരിപാലന വീഴ്ചകളും ജനങ്ങളുടെ സുരക്ഷയെ ദോഷകരമായി ബാധിക്കുന്നതായി നാട്ടുകാർ പരാതിപ്പെടുന്നു.നിലവിൽ തടയണയിൽ രണ്ട് സ്ലാബുകൾ മാത്രമാണ് ഉള്ളത്, അവയും ദ്രവിച്ച അവസ്ഥയിലാണ്. ദിവസേന നൂറുകണക്കിന് ആളുകൾ, പ്രത്യേകിച്ച് പോർക്കൊരിക്കൽ ക്ഷേത്രത്തിലേക്ക് പോകുന്ന ഭക്തർ, ഈ തടയണയുടെ മുകളിലൂടെ നടക്കുന്നു. സ്ലാബുകളുടെ അഭാവവും ദ്രവിച്ച അവസ്ഥയും അപകട സാധ്യത വർധിപ്പിക്കുന്നു. ഏഴ് അടി താഴ്ചയുണ്ടായിരുന്ന തടയണ ഇപ്പോൾ മണ്ണ്, മണൽ,കല്ല്, ചെളി എന്നിവയാൽ നിറഞ്ഞ് മൂന്നടി താഴ്ചയിലേക്ക് ചുരുങ്ങിയിരിക്കുന്നു.കഴിഞ്ഞ മൂന്ന് വർഷമായി ഷട്ടറുകൾ തുറക്കാത്തതിനാൽ ചെളി, പ്ലാസ്റ്റിക്, മറ്റ് മാലിന്യങ്ങൾ എന്നിവ അടിഞ്ഞുകൂടി.മഴക്കാലത്ത് മാലിന്യങ്ങൾ ഒഴുക്കിക്കളയാൻ ഷട്ടറുകൾ തുറക്കേണ്ടതിന് പകരം, ഉദ്യോഗസ്ഥരുടെ അനാസ്ഥ കാരണം ഇത് നടക്കുന്നില്ല. ഇത് പുഴയുടെ സ്വാഭാവിക ജലപ്രവാഹത്തെ തടസ്സപ്പെടുത്തുകയും മണ്ണിടിച്ചിലിന് കാരണമാകുകയും ചെയ്യുന്നു.ഈ അവസ്ഥ പോർക്കൊരിക്കൽ ക്ഷേത്രത്തിന്റെ സംരക്ഷണഭിത്തി തകർക്കുകയും ക്ഷേത്രത്തെ അപകടാവസ്ഥയിലാക്കുകയും ചെയ്യുന്നു.പോത്തോഴിക്കാവ് തടയണയുടെ ശോചനീയാവസ്ഥ പരിഹരിക്കാൻ അധികാരികൾ ഇടപെടണമെന്നാണ് നാട്ടുകാരുടെ ആവശ്യം.
Post a Comment