നി​ർ​മാ​ണ​ത്തി​ൽ ഗു​രു​ത​ര​ സാ​ങ്കേ​തി​ക പി​ഴവ്. 65 ല​ക്ഷം ചെ​ല​വി​ട്ട് എ​രു​മേ​ലി പ​ഞ്ചാ​യ​ത്ത്‌ നി​ർ​മി​ച്ച എ​ൽ​പി​ജി ശ്മ​ശാ​ന​ത്തി​ന്‍റെ പ്ര​വ​ർ​ത്ത​നം ആ​രം​ഭി​ക്കാ​നാ​വുന്നില്ല. മൃ​ത​ദേ​ഹം സം​സ്‌​ക​രി​ച്ചാ​ൽ ഫ​ർ​ണ​സും കെ​ട്ടി​ട​വും നി​റ​ഞ്ഞ് ക​ടു​ത്ത പു​ക വ്യാ​പി​ക്കും.

 

എ​രു​മേ​ലി: മൃ​ത​ദേ​ഹ​ങ്ങ​ൾ സം​സ്ക​രി​ക്കാ​ൻ സ്വ​ന്തം സ്ഥ​ല​വും സൗ​ക​ര്യ​വും ഇ​ല്ലാ​ത്ത​വ​ർ​ക്കും നി​ർ​ധ​ന​ർ​ക്കും പ്ര​യോ​ജ​നം ന​ൽ​കാ​നു​ള്ള ലക്ഷ്യത്തോടെ 65 ല​ക്ഷം രൂപ ചെ​ല​വി​ട്ട് എ​രു​മേ​ലി പ​ഞ്ചാ​യ​ത്ത്‌ നി​ർ​മി​ച്ച എ​ൽ​പി​ജി ശ്മ​ശാ​ന​ത്തി​ന്‍റെ പ്ര​വ​ർ​ത്ത​നം ആ​രം​ഭി​ക്കാ​നാ​കാ​തെ അ​ധി​കൃ​ത​ർ വി​ഷ​മ​വൃ​ത്ത​ത്തി​ൽ. പ്ര​വ​ർ​ത്ത​നം ആ​രം​ഭി​ക്കാ​ൻ ഇ​നി വൈ​കി​യാ​ൽ വി​ഷ​യം നി​യ​മ​സ​ഭ അ​ക്കൗ​ണ്ട്സ് ക​മ്മി​റ്റി​യി​ൽ അ​റി​യി​ക്കു​മെ​ന്ന് ലോ​ക്ക​ൽ ഫ​ണ്ട് ഓ​ഡി​റ്റ് വി​ഭാ​ഗം മു​ന്ന​റി​യി​പ്പ് ന​ൽ​കി​​. നി​ർ​മാ​ണ​ത്തി​ൽ സം​ഭ​വി​ച്ച ഗു​രു​ത​ര​മാ​യ സാ​ങ്കേ​തി​ക പി​ഴ​വാ​ണ് പ്ര​ശ്ന​മാ​യ​ത്. മൃ​ത​ദേ​ഹം സം​സ്‌​ക​രി​ച്ചാ​ൽ ഫ​ർ​ണ​സും കെ​ട്ടി​ട​വും നി​റ​ഞ്ഞ് ക​ടു​ത്ത പു​ക വ്യാ​പി​ക്കു​മെ​ന്നു​ള്ള നി​ല​യി​ലാ​ണ് ട്ര​യ​ൽ റ​ൺ ന​ട​ന്ന​ത്. ഇ​തോ​ടെ പ്ര​വ​ർ​ത്ത​നം ആ​രം​ഭി​ക്കാ​ൻ സാ​ധി​ച്ചി​ല്ല.

നേ​ർ​ച്ച​പ്പാ​റ വാ​ർ​ഡി​ൽ ക​മു​കി​ൻ​കു​ഴി​യി​ൽ 2019ലാ​ണ് ശ്മ​ശാ​ന​ത്തി​ന്‍റെ നി​ർ​മാ​ണം ആ​രം​ഭി​ച്ച​ത്. എ​ന്നാ​ൽ, നി​ർ​മാ​ണം പൂ​ർ​ത്തി​യാ​കു​ന്ന​തി​ന് മു​മ്പ് 2020 ഒ​ക്ടോ​ബ​ർ 15ന് ​അ​ന്ന​ത്തെ പ​ഞ്ചാ​യ​ത്ത്‌ ഭ​ര​ണ​സ​മി​തി ഉ​ദ്ഘാ​ട​നം ന​ട​ത്തി. ഇ​തി​ന് ശേ​ഷം മൂ​ന്നു വ​ർ​ഷം ക​ഴി​ഞ്ഞു 2023 ലാ​ണ് നി​ർ​മാ​ണം പൂ​ർ​ത്തി​യാ​യ​ത്. ധ​ന​കാ​ര്യ ക​മ്മീ​ഷ​ൻ ഗ്രാ​ന്‍റ് അ​മ്പ​ത് ല​ക്ഷ​വും ത​ന​ത് ഫ​ണ്ട് 20 ല​ക്ഷ​വും ഉ​ൾ​പ്പ​ടെ 70 ല​ക്ഷ​മാ​യി​രു​ന്നു ഫ​ണ്ട്. ഇ​തി​ൽ 65 ല​ക്ഷം ചെ​ല​വി​ട്ട് സ​ർ​ക്കാ​ർ അ​ക്ക്ര​ഡി​റ്റ​ഡ് ഏ​ജ​ൻ​സി കോ​സ്റ്റ് ഫോ​ർ​ഡ് ആ​ണ് നി​ർ​മാ​ണം ന​ട​ത്തി​യ​ത്.

അ​തേ​സ​മ​യം ചൂ​ള നി​ർ​മി​ച്ച​ത് ജ്വാ​ല എ​ന്ന ഏ​ജ​ൻ​സി​യാ​യി​രു​ന്നു. ആ​റ് ഗ്യാ​സ് സി​ലി​ണ്ട​ർ ഉ​പ​യോ​ഗി​ച്ച് മൃ​ത​ദേ​ഹം ദ​ഹി​പ്പി​ക്കു​ന്ന​തി​നാ​ണ് ഇ​വി​ടെ ഫ​ർ​ണ​സ്‌ സം​വി​ധാ​ന​മു​ള്ള​ത്. ഫ​ർ​ണ​സി​ന് ഒ​രു വ​ർ​ഷ​വും ഉ​പ​ക​ര​ണ​ങ്ങ​ൾ​ക്ക് ര​ണ്ടു വ​ർ​ഷ​വും വാ​റ​ന്‍റി കാ​ലാ​വ​ധി വേ​ണ​മെ​ന്ന് വ്യ​വ​സ്ഥ​യു​ണ്ടാ​യി​രു​ന്നു. എ​ന്നാ​ൽ, ഇ​തു സം​ബ​ന്ധി​ച്ച് ഏ​ജ​ൻ​സി​ക​ളു​മാ​യി ക​രാ​ർ ചെ​യ്തി​ട്ടി​ല്ല. ഇ​തു മൂ​ലം ഏ​ജ​ൻ​സി​ക​ൾ​ക്ക് ശ്മ​ശാ​നം പ്ര​വ​ർ​ത്തി​പ്പി​ച്ച് ബോ​ധ്യ​പ്പെ​ടു​ത്തേ​ണ്ട ഉ​ത്ത​ര​വാ​ദി​ത്തം ഇ​ല്ലെ​ന്ന് പ​റ​യു​ന്നു.

ക​ഴി​ഞ്ഞ വ​ർ​ഷം ഫെ​ബ്രു​വ​രി​യി​ൽ ചേ​ർ​ന്ന പ​ഞ്ചാ​യ​ത്ത്‌ ക​മ്മി​റ്റി വി​ഷ​യം ച​ർ​ച്ച ചെ​യ്യു​ക​യും ട്ര​യ​ൽ റ​ൺ ന​ട​ത്തി ശ്മ​ശാ​ന​ത്തി​ന്‍റെ പ്ര​വ​ർ​ത്ത​നം ആ​രം​ഭി​ക്കാ​ൻ അ​സി​സ്റ്റ​ന്‍റ് എ​ൻ​ജി​നി​യ​റെ ചു​മ​ത​ല​പ്പെ​ടു​ത്തു​ക​യും ചെ​യ്തു. ഇ​തോ​ടെ​യാ​ണ് ട്ര​യ​ൽ റ​ൺ ന​ട​ത്തി​യ​ത്.

മൃ​ത​ദേ​ഹം കി​ട്ടാ​നു​ള്ള ബു​ദ്ധി​മു​ട്ട് മൂ​ലം പ​ക​രം ഡ​മ്മി ഉ​പ​യോ​ഗി​ച്ചാ​യി​രു​ന്നു ട്ര​യ​ൽ റ​ൺ. ഫ​ർ​ണ​സ് നി​റ​ഞ്ഞ നി​ല​യി​ൽ ക​ടു​ത്ത പു​ക കെ​ട്ടി​ട​ത്തി​ലു​ട​നീ​ളം ട്ര​യ​ൽ റ​ണ്ണി​ൽ വ്യാ​പി​ച്ചി​രു​ന്നു. ഇ​തു സാ​ങ്കേ​തി​ക ത​ക​രാ​ർ മൂ​ല​മാ​ണെ​ന്ന് ബോ​ധ്യ​പ്പെ​ട്ട​തോ​ടെ ഏ​ജ​ൻ​സി​യോ​ട് ഇ​ത് പ​രി​ഹ​രി​ക്ക​ണ​മെ​ന്ന് നി​ർ​ദേ​ശി​ച്ചി​രു​ന്നു.

എ​ന്നാ​ൽ വി​വി​ധ പ​രി​ശോ​ധ​ന​ക​ൾ ന​ട​ത്തി​യ ഏ​ജ​ൻ​സി​ക്ക് ഇ​തു​വ​രെ​യും ത​ക​രാ​ർ പ​രി​ഹ​രി​ക്കാ​നാ​യി​ട്ടി​ല്ല. എ​ത്ര​യും വേ​ഗം പ്ലാ​ന്‍റി​ലെ ത​ക​രാ​ർ പ​രി​ഹ​രി​ച്ച് ബൈ​ലോ ത​യാ​റാ്കി പൊ​തു​ജ​ന​ങ്ങ​ൾ​ക്ക് തു​റ​ന്നു കൊ​ടു​ക്ക​ണ​മെ​ന്നും അ​ല്ലാ​ത്ത പ​ക്ഷം നി​യ​മ​സ​ഭ അ​ക്കൗ​ണ്ട്സ് ക​മ്മി​റ്റി​യു​ടെ പ​രി​ഗ​ണ​ന​യ്ക്ക് ശി​പാ​ർ​ശ ചെ​യ്യു​മെ​ന്നും ലോ​ക്ക​ൽ ഫ​ണ്ട് ഓ​ഡി​റ്റ് വി​ഭാ​ഗം മു​ന്ന​റി​യി​പ്പ് ന​ൽ​കി​യി​രി​ക്കു​ക​യാ​ണ്.